Budget sa Talisay sunod tuig labaw'g P27 milyones

CEBU, Philippines - Ang budget sa sunod tuig sa dakbayan sa Talisay labaw og P27 milyones itandi sa budget niining tuiga 2010.

Niadtong Lunes atol sa special session sa konseho sa Talisay naaprobahan sa first reading ang gidusong appropriation ordinance alang sa P464, 578,460.80 milyones nga annual budget sa sunod tuig.

Sa maong budget ang Maintenance and Other Operation maoy may dakong bahin niini nga mikabat og P198,506,538.78.

Samtang ang Personal Services maoy ikaduha nga mikabat usab og P96,072,327.60 ug ubos sa maong item ang Salary and Wages alang sa regular nga kawani sa siyudad nga gigahinan og P60,887,484 ug ang P360,000 nga budget alang sa mga contructual nga kawani.

Samtang ang Capital Outlay gigahinan og P19,281,307.37 samtang ang Non Office Expenditures may gahin nga P88,390,574.05.

 Ang nangamahan sa maong ordinansa mao si Konsehal Rodolfo Cabigas, chairman sa Committee on Appropriation, Budget Management Ways and Means ug ang misuporta mao sila si Konsehal Eduardo Gullas III, Richard Francis Aznar, Bernard Joseph Odilao ug Dennis Basillote nga mga miyembro sa nahisgutang komitiba.

Ang nahisgutang ordinansa tukion pa sa mga umaabot nga   hearing ug i-finalize pa usab sa mga department head sa siyudad lakip na sa mga konsehal.

Human ma-finalize, ibalik ang maong ordinansa ngadto sa konseho alang sa approval sa second, third ug final reading niini. (BANATNEWS)