Inahan sa mga batang gipatay, gihulga

CEBU, Philippines - Gisusi sa kapolisan ang gibug-aton sa pagpanghulga ngadto sa duha ka inahan sa duha ka mga bata nga gipatay sa mga care taker sa usa ka manokan didto sa barangay Cubacub, dakbayan sa Mandaue sa miaging buwan.

Si Inspector Ramil Morpos, hepe sa Investigation Detection and Investigation Bureau (IDMB) mibutyag sa Banat News, nga nagsakay kuno og motorsiklo ang mga tawong mihulga na usab sa duha ka inahan sa mga gipusil patay nga mga bata.

 Matud pa niya nga sila si Mary Acquesta maoy inahan ni Arjay Acquesta, 13 ug Emma Soco, inahan usab ni Ellary Villaren, 12, misumbong sa ilang buhatan sa miaging adlaw ug mibutyag sa nadawat nilang hulga. 

Si Morpos miingon nga ilang gisuta ang gibug-aton sa maong pagpanghulga kun unsa kini ka seryuso nga maoy ilang basehan sa rekomendasyon sa pagpahimulos sa witness protection program nga gitanyag sa kagamhanan.

Dugang pa niya, nga miasoy ang duha ka inahan kanila nga gikan pa sila sa city hall ug mopaingon na unta ngadto sa buhatan sa kapolisan niadtong tungora, dihang kalit lang mihunong sa ilang tungod ang motorsiklo nga giluwanan sa usa ka wala hiilhing lalaki nga nagtaptap sa dagway kinsa miingon nga may mahitabo sa ilang kinabuhi kun dili sila modawat sa gitanyag nga kuwarta.

Giingnan kuno sila nga kun iatras nila ang kaso batok sa mga mipatay sa ilang mga anak nga sila si Lucas Taaoy, 35 anyos ug Jesson Laurente, 24 anyos, hatagan sila og kuwarta.

Ang duha ka mga suspetsado mikagulkol na karon sa prisohan ug double murder nga kaso maoy ilang giatubang karon sa korte. (BANATNEWS)