Tanod gipatay'g 17-anyos

CEBU, Philippines - Usa ka tanod ang patay ug laing usa ang angol sa nahitabong pagpamusil kagahapon sa kadlawon ug niadtong Sabado sa gabii sa duha ka mga bukirang barangay sa lungsod sa Dalaguete.

Patay diha-diha si Antonio Acosta, 30, tanod sa barangay Bulak sa maong lungsod, human kini pusila sa usa ka 17-anyos nga bayongbayong nga iyang nakaaway kagahapon sa kadlawon didto sa ilang barangay.

Ang bayongbayong daling miikyas human sa hitabo ug padayon pa kining gipangita sa mga polis.

Si Acosta nakaangkon og samad pinusilan sa ubos nga bahin sa walang apapangig nga maoy hinungdan sa iyang kamatayon.

Si SPO1 Veronico Centino nga nahinabi sa Banat News kagahapon mibutyag nga gituohan nga personal ang hinungdan sa away sa duha.

 Sa wala pa mahitabo ang pagpamusil si Acosta ug ang menor nagkasinukmagay pa kini.

Sila si SPO1 Edwin Quilaton ug PO2 Reynaldo Amarilento ang daling miresponde sa hitabo.

Sa laing bahin, usa ka 30-anyos nga mag-uuma naangol sa nahitabong sa dihang gipusil kini sa iyang gikabangi didto sa barangay Obo sa mao gihapong lungsod niadtong Sabado sa alas 11:20 sa gabii.

Ang biktima giila sa mga polis nga si Alan Milay, taga barangay Sacsac, Dalaguete kinsa nakaangkon og samad pinusilan sa buko-buko ug gidala kini ngadto sa Cardinal Rosales Memorial Hospital apan tungod sa kahimtang niini gibalhin ngadto sa usa sa mga tambalanan sa dakbayan sa Sugbo. Ang suspetsado mao si Christopher Belandres, 30, nga taga   barangay Obo kinsa misibat usab dayon human sa hitabo ug padayon pa kining gipangita sa mga polis.

Si SPO1 Centino nagkanayon nga personal nga bangi nga maoy gituohan nilang motibo sa insidente.

Ang motorsiklo sa suspetsado ug biktima mao na lang ang naabtan sa mga polis nga miresponde didto sa lugar diin nahitabo ang krimen. (BANATNEWS)