Mikirig namatay

CEBU, Philippines - Patay ang usa ka construction worker human makuryentihi pasado alas-4 sa miaging hapon sa barangay Ward 2 lungsod sa Minglanilla sulod sa gitrabahoang gitukod nga usa ka mall sa maong lugar. Ang namatay mao si Cresenciano Abellar, kasamtangang nagpuyo sa barangay Lagtang syudad sa Talisay.

Base sa imbestigasyon sa kapolisan, padulong unta sa iyang bunk house si Abellar ug nakatunob og tubig nga nagpundo sa salog ug wala damhang aduna diay live wire nga nahumol sa maong tubig.

Diha-diha pagkatamak ni Abellar mikirig-kirig kini ug natumba ug nawad-an og panimuot ug uwahi na dihang nabantayan sa mga kauban ug gipawong ang kuryente dayon gidala sa Minglanilla District Hospital apan gideklarar kini nga dead on arrival.

Sa pakighinabi sa Banat News ni PO1 Raymund Romarez kini mibutyag nga ilaha karong gisusi kun gituyo ba o aksidente ang pagkatusmod sa maong live wire aron matino kun duna bay angayang patubagon sa maong hitabo. (BANATNEWS)