Manag-uyab gitulis dalaga gilugos pa gyud

CEBU, Philippines - Usa ka 19-anyos nga dalaga ang gilugos human pukpoka og bato ang ulo sa iyang uyab sa usa ka tulisan diha sa baybayon sa barangay Buagsong sa lungsod sa Cordova   kagahapon sa kaadlawon.

Hinuon wala makaipsot ang suspek nga si Dante Tura, 23, nagpuyo usab sa maong dapit kinsa positibong giila sa dalaga ug sa 29- anyos niining hinigugmang lalaki (mga pangalan gipugngan sa Banat News) nga maoy mitulis kanila sa wala pa lugosa ang dalaga. Si Sr. Insp. Felix Pacaldo, hepe sa kapolisan sa maong lungsod dihang nahinabi sa Banat News miingon sa iyang pagpakighinabi sa mga biktima iyang nasayran nga gikan pang namista sa dakbayan sa Lapulapu sa miaging gabii ang duha ug midiretso og night swimming sa maong dapit.

Dugang pa ni Pacaldo nga sa wala pa ang paglugos sa dalaga giingong ‘gilili’ sila sa suspek samtang naghumol sa dagat sulod sa pipila ka oras. Sa dihang nihaw-as na ang duha gisugat sila sa suspetsado nga nagtion og kutsilyo ug mideklarar og tulis.

Matud pa ni Pacaldo nag-ukon-ukon ang mga biktima paghatag sa ilang kuwarta ug mga cellphone hinungdan nga giguyod sa suspetsado ang dalaga ug gipasandig sa dakong gaang (bato) daplin sa baybayon.

Tungod niini midasmag ang uyab sa dalaga apan wala kini makabantay nga naggunit na diay og bato ang suspek dayong hapak niini ngadto sa ulo sa lalaki.

Dangtan og pila ka minutos naulian ang lalaki sa panimuot wala na diha ang tulisan ug iyahang nakit-an ang uyab nga nagkaang-kaang na nagping-it ug diha lang niini masayring gilugos kini makadaghang higayon sa suspek diha sa kagaangan.

Tungod niini midangop sa kapolisan ang duha ug sa gihimong follow up sa kapolisan nasikop ang suspek diha sa maong dapit. (BANATNEWS)