CEBU, Philippines - Naalibwag pagpanagan ang mga tawo kilid sa simbahan sa gipistahang Birhen sa Regla sa dakbayan sa Lapulapu kagahapon dihang usa ka lalaki ang kalit lang nga naghuramentado ug nanunggab og mga tawo nga miresulta sa pagkaangol sa pito.
Ang naghuramentado diha sa Plaza Rizal sa barangay Poblacion giilang si Rosalio Marle Tariman, 22, lumad nga taga Zamboanga City apan wala pa matino diin kini magpuyo dinhi sa Sugbo.
Sa pagpakighinabi sa Banat News kang PO3 Dioscoro Arong sa Homicide Section, giila niini ang mga nangasamdan mao sila si Rosita Arabes Gilig, 56; Ruel Cerencio, 26; Teresita Macalipay, 60, nga ice drop vendor sa maong dapit; Larry Canete, 33; Baby Lyn Amabao, 26; Andresa Sumalinog, 38; ug Jeffrey Vargas, 22.
Matud pa niya nga ang mga biktima pulos nakabaton og samad dinunggaban sa ilang buko-buko ug ang nagrabehan mao si Macalipay nga nasampakan gyud sa 12-pulgadas nga kutsilyo sa suspek tungod kay wala kini makadagan og maayo palayo.
Sumala pa ni PO3 Arong, nataymingan nga dunay nag-Field Training Program (FTP) nga si PO1 Archie Borres ug PO1 Ruel Pelone nga sakop sa augmentation force maoy unang nakatubag sa maong alarma.
Matud pa nga gi-awhag nila Borres ug Pelone ang suspetsado sa paglabay sa gidala niining kutsilyo apan wala kini manumbaling ug mipadayon sa paggukod sa mga tawo hinungdan nga ilaha kining gipusil.
Ang suspek pagkaigo sa buko-buko una pa mibutang sa kutsilyong iyang gibitbit. Ang mga biktima ug suspetsado unang gidala sa Lapulapu District Hospital ug gibalhin sa Don Vicente Sotto Memorial Medical Center ug Cebu City Medical Center sa dakbayan sa Sugbo.
Wala pa matino sa kapolisan unsay hinungdan sa paghuramentado sa suspek sanglit wala pay kabanay nga mibisita niini.
Sa laing hitabo sa bisperas sa pista, duha ang gipamusil lakip ang usa ka 17-anyos ug usa ka Acelito Alcantara, 42, pulos taga barangay Chamba-Chamba sa barangay Pusok, dakbayan sa Lapulapu sa usa ka giila lang sa pangalang Epet.
Si SPO2 Rolito Jumao-as nagkanayon nga nagtabi ang duha sa maong dapit dihang giduol sa suspek dayong pusil kanila sa walay igong hinungdan. Ang 17-anyos naigo sa kamot samtang sa dapidapi naigo si Alcantara ug gipangdala sa Lapulapu District Hospital.
Samtang nalandig sa tambalanan ang usa ka Koreano nga si Bae Keon Woo, 29, human dunggaba sa laing Koreano nga si Kim Sung Su human mangahubog ug naglalis. Ang suspek misibat human sa hitabo. (BANATNEWS)