Naglukdo og kahoy nadasmagan

CEBU, Philippines - Kritikal ang kahimtang sa usa ka lalaki human kini mabangga-i sa usa ka motor sa miaging buntag sa Tulay bayan barangay Baring lungsod sa Carmen samtang samaran usab ang backrider sa motor nga nakabangga.

Ang biktima nailhan nga si Reynaldo Roble, 44, molopyo sa barangay Catipay sa maong lungsod samtang ang backrider sa nakabangga niini nailhan nga si Arnold Capuyan Sotto, molupyo usab sa barangay Santican lungsod sa Carmen.

Base sa imbestigasyon sa kapolisan sa lungsod sa Carmen nasayran nagbaklay ang biktima sa maong lugar samtang naglukdo og kahoy.

Apan sa paglabang niini kalit nga nadasmagan sa maong motorsiklo nga nakaingon sa pagkalagpot sa biktima ug sa backrider sa suspetsado hinungdan nga gidali kini sila pagdala. Ang backrider sa suspetsado gidala sa Danao District Hospital samtang ang biktima gidala usab sa usa sa mga tambalanan sa syudad sa Sugbo. Matud pa ni PO2 Dario Baguio sa diha nga nahinabi sa Banat News nga ilang kapolisan mipahigayon pa og follow-up operation aron masubay ang drayber nga misibat.

Samtang mibutyag usab si Baguio nga usa sa mga nabiktima ang giingong nakabsan na sa kinabuhi apan ila pa nga gisusi kon si kinsa niini. (BANAT NEWS)