2 Negosyante gipamusil

CEBU, Philippines - Duha ka mga tawo nga nalambigit og negosyo ang gipamusil ug namatay sa managlahing lugar ug takna dinhi sa dakbayan niadtong Biyernes ug kagahapon sa buntag.

Namatay diha-diha ang tag-iya sa Annie-Dhongs RTW human kini gipusil kagahapon diha sa Osmeña Boulevard sa barangay Sto. Niño pasado alas 8:30 sa buntag sa wala mailhing lalaki.

Ang biktima mao si Richard Villamor, 53 molupyo sa Tabok Kanal- Alumnos sa barangay Basak-San Nicolas ning dakbayan human kini makaangkon og samad pinusilan diha sa tuong bahin sa nawong nga nakaingon sa hinanali niining kamatayon.

Sa imbestigasyon ni PO2 Ricky Coca sa Cebu City Police Office (CCPO) mibutyag nga ang biktima nakaangkon og samad pinusilan sa tuong bahin sa nawong maoy gituohang hinungdan sa kalit nga kamatayon niini.

Ang impormante nga si Sablari Pakasi, 47, security guard ug ang 15-anyos nga tindera sa biktima mibutyag sa kapulisan nga ang biktima padulong untang mangabli sa iyang tindahan apan ang wala mailhing lalaki kalit miabot ug dayon pusil sa biktima.

Ang CSI personnel nakakuha og duha ka basiyo sa kalibre 9mm nga bala, pitaka sa biktima nga adunay mga importanteng dokumento, relo, cellphone ug kwarta nga P250.

Sa pakighinabi sa Banat News kang PO2 Michael Codaste ang suspetsado giingong nagsuot og fullface helmet nga kolor pula ug nagsul-ob og yellow nga jersey.

Matud ni Codaste ang suspetsado kalma ra kaayong milakaw palayo human sa pagpamusil.Wala pa nila matino kung unsay motibosa maong pagpamusil.

Samtang niadtong Biyernes sa hapon, usa ka Arnold Cabando, 38, nga negosyante og isda ang gipusil diha sa sitio Hala-hala, sa barangay Suba ning dakbayan.

Matud pa sa mga nakasaksi nga naglingkod ang biktima ug nakig-estorya sa iyang higala dihang kalit mibutho ang usa ka wa mailhing lalaki sakay sa usa ka motorsiklo ug mipusil sa biktima ug daling misibat palayo sa maong dapit.

Ang biktima nakaangkon og duha ka samad pinusilan sa luyong bahin sa ulo ug liog ug gidali kini pagdala sa Cebu City Medical Center apan sumala pa ni SPO4 Felipe Sosmeña sa Police Station 6 sa pakighinabi sa Banat News nakabsan gyud kini sa kinabuhi diha sa maong tambalanan.

Ang mga sakop sa kapolisan sa Station 6 pinangulohan ni Insp. Elizar Abrigana daling miresponde sa maong dapit nakakuha sa crime scene og duha ka mga kabhang sa bala nga gituohang gikan sa kalibre .45 nga pistola.

Ang kapolisan wala pay matumbok nga mamumuno ug motibo sa maong pagpamusil. (Ug report nila ni Reina Vita Labang, ug Maria Ana Carmela Estenor USJR) (BANAT NEWS)