Talisay jail himoa'g playground

CEBU, Philippines - Ang warden sa Talisay City Jail nanghinaot nga magahinan og budget ang iyang gihangyong proyekto nga mao ang pagpatukod og playground sa sulod sa city jail.

Si Chief Inspector Renante Rubio nga nahinabi sa Banat News kagahapon nagkanayon nga kapin na sa duha ka buwan human niya maduso ngadto sa buhatan ni Mayor Socrates Fernandez ang iyang hangyo kabahin sa pagpatukod sa nahisgutang proyekto ug nanghinaot siyang magahinan kini og budget.

 Si Rubio mipasabot nga ang Talisay City Jail adunay 330 ka mga piniriso diin 48 niini mga babaye.

Sa 330, kaping   90 porsyento niini mga Talisaynon ug sa nahisgutang 90 porsyento , 20 porsyento lang kanila ang adunay “dalaw” o mobisita nga pamilya.

Ang “dalaw” maoy usa sa labing importanteng butang sa mga inmate apan uban sa ilang pamilya kinsa binuwan nga mobisita tungod sa problema sa pinansiyal ug dili pa mokuyog ang mga anak tungod kay mauwaw nga sungogon sa ilang mga higala nga ang ilang amahan o inahan usa ka inmate.

Aron sa pagkuha sa atensiyon sa mga bata nga mobisita sa ilang ginikanan nga nabilanggo, buot ni Rubio nga magtukod og playground diha sulod sa city jail.

Matud niya nga ang maong playground tukoron dapit sa ikaduhang gate sa jail aron ang guard on duty makalantaw sa mga bata nga nagduwa-duwa samtang ang mga ginikanan nila nag-istoryahanay.

Gawas pa niini mahatagan og kalipay usab ang usa ka inmate nga makagakus ug makauban sa iyang anak bisan og naa siya sulod sa bilanggoan.

Gibutyag usab sa jail warden nga kung matuman ang maong proyekto ang Talisay City Jail maoy ikaduhang prisohan dinhi sa rehiyon-7 nga adunay playground diin ang una mao ang city jail sa dakbayan sa Toledo.

Matag adlaw gitugotan ang pagdalaw diha sa Talisay City Jail gawas sa adlaw’ng Lunes tungod kay mao kining adlawa nga gigahin sa mga piniriso alang sa mga personal nilang buluhaton usa na niini mao ang pagpanglaba sa ilang mga sinena. Gikan sa Martes hangtud sa Biyernes ang oras sa dalaw ala 1:00 sa hapon hangtud sa alas 5:00 sa hapon tungod kay sa buntag ang mga inmate kinahanglan mang motambong sa ilang religious activity, literacy ug livelihood program.

Sa Sabado ug Domingo ang oras sa dalaw gikan sa alas 9:00 sa buntag hangtud sa alas 5:00 sa hapon. (BANAT NEWS)