CEBU, Philippines - Nagkasabot ang National Nutrition Council (NNC) ug ang Kapisanan ng mga Brodkaster ng Pilipinas (KBP) nga mohimo og kampanya batok sa nagkataas nga problema sa kagutom ug malnutrisyon sanglit may 20 na ka milyon karon ka Pilipino ang gipang-gutom. Gipahigayon kini didto sa Crown Regency Hotel and Towers sa miaging buntag.
Tumong sa NCC ang paglusad sa Broadcaster’s Manual diin usa kini ka gabayan sa hustong pagkaon sa mga Pilipino ug maoy gamiton sa medya sa paghatag og mga impormasyon bahin sa hustong nutrisyon.
Ang Memorandum of Agreement (MOA) sa Broadcasters’ Manual gipirmahan ni Dr. Parolita Mission, Region 7 Nutrition Program Coordinator ug ni Carlo Dugaduga, ang KBP president.
Ang kalihokan gisalmotan sa nagkalain-laing mga ahensya sa kagamhanan, media ug local nga kagamhanan.
Sigun pa ni Dr. Mission nga nakigtambayayong sila sa media tungod sa gahom niini sa pagpadangat sa mga impormasyon ngadto sa mga katawhan ug sa Cebu Bloggers Society kay sila maoy mopaabot sa maong butang ngadto sa mga kabatan-unan pinaagi sa mga blogs. (BANAT NEWS)