Menor nga armado nasikop sa checkpoint

CEBU, Philippines - Nasikop sa mga otoridad ang usa ka menor de edad kinsa nasakpang nagtangkil og armas nga walay lisensya atol sa usa ka check point nga gipahigayon didto sa barangay Lawaan I, dakbayan sa Talisay sa miaging gabii.

Ang nadakpan kansang ngalan gipugngan, nagpuyo sa barangay Cogon, dakbayan sa Sugbo.

Nakuha gikan kaniya ang usa ka .38 Kalibreng revolver nga walay serial number ug walay bala.

Ang checkpoint nga gidumala nila ni P/Sr. Insp Errol Francis Deveyra, P/Insp Alvin Llamedo, P/Insp Christopher Castro ug PO1 Diosdado Namang ubos sa kamandoan ni Police Superintendent Henry Biñas. Sa pakighinabi sa Banat News kang P/Insp. Christopher Castro nasayran nga ang dinakpan adunay kauban ug gikang nangaligo og dagat sa Minglanilla.

Samtang nagsakay kini og motorsiklo paatubang sa dakbayan sa Sugbo gikan sa habagatan, gipara sa kapolisan nga nag-checkpoint sa Lawaan ug didto hisakpi ang suspetsado nga may dalang armas de fuego. (BANAT NEWS)