Garcia, mga opisyales ipakiha

CEBU, Philippines - Girekomendar ngadto sa Ombudsman for the Visayas si Gob. Gwendolyn Garcia ug ubang mga opisyal sa lalawigan nga pakasuhan labot sa kontrobersyal nga pagkapalit sa Balili property sa Tinaan, Naga.

Base sa report sa ABS-CBN Central Visayas, ang final evaluation report nga gisumiter ni graft investigator Roderick Blazo kalabot sa kontrobesyal nga luna nga nagkantidad og kapin P90 milyones giingong gi-aprobahan kini sa ombudsman sa kaulohan.

Sa evaluation sa Ombudsman sa kaulohan nakita nga nakalapas gyud sa Anti Graft and Corrupt Practices Act si Garcia ug uban pang mga opisyal.

Hayan makasuhan og kriminal ug administratiba sila si Garcia, Bise Gob. Gregorio Sanchez, kanhi board member Juan Bolo ug uban nga mga tawo nga nalambigit sa maong transakyon. Hinuon ang fact finding body mohimo pa og formal investigation pagsusi kun may merito o probable cause ang pagpasaka og kaso batok sa maong mga opisyal.

Si Garcia ug Sanchez posibleng di maapil sa kasong administratiba tungod sa Aguinaldo Doctrine.  – BANAT NEWS