8-anyos nakaangol og bata gamit ang "pen gun"

CEBU, Philippines - Usa ka 8-anyos nga batang lalaki ang aksidenteng nakaangol sa silingang 14-anyos human niya kini aksidenteng napusilan gamit ang usa ka ‘pen gun’ diha sa UCMA Village sa Barangay Apas kagahapon sa pasado alas 5:00 sa hapon.

Ang biktima usa ka studyante sa 3rd year high school (pangalan gipugngan sa Banat News) nakaangkon og samad pinusilan sa ibabaw nga bahin sa iyang walang dughan.

Ang 8-anyos nga nakapusil sa biktima gidala na ngadto sa barangay Apas alang sa tukmang lakang apan sumala pa ni PO2 Edario Manatad wala tuyoa sa bata ang hitabo ug wala usab kini makahibalong improvised nga.22 kalibreng armas ang iyang gikuptang ballpen.

Sa imbestigasyon sa mga kapulisan sa Cebu City Police Office (CCPO) ang 8-anyos nagduwa uban sa manghod sa biktima diha sa balay sa nahauna.

Apan sa pagsulod sa biktima kalit nga may nadungog silang buto sa armas ug dangtan pila ka gutlo nabatyagan nalang niini nga misakit ang ibabaw’ng bahin sa walang dughan ug miagas ang dugo.

Sa pakighinabi sa Banat News ni PO2 Edario Manatad human mahibaw-ing gikan sa gikuptang ‘pen gun’ ang nakaigo sa biktima giingong daling miduol ang bata ug militok sa pag-ingon og “ate sorry” ug dayun misulod sa ilang balay.

Ang biktima daling gidala sa Perpetual Soccour Hospital ug giingong luwas na ang kahimtang. – BANAT NEWS