Boxing itudlo sa PE

CEBU, Philippines - Gitinguha sa konseho sa dakbayan sa Mandaue nga iapil sa Physical Education (PE) ang boxing alang sa mga tinun-an sa secondarya.

 Kini base sa resolution nga gipangamahanan ni Konsehal Bethoven Andaya ang Chairman sa Committee on Education.

 Hinuon iyang gipasabot nga dili himoong compulsory ang pagpatuman niini, kundi kadto lang ganahan nga mokuha sa maong subject maoy tudloan og boxing.

 Kini sa tinguha nga makakaplag na ang nasud karon og mohulip kang Manny Pacquiao sa higayong moritero na kini sa pamoksing.

Sa maong resolution nagbuot nga awhagon sa konseho sa dakbayan sa Mandaue ang Regional Director sa DepEd sa paglakip na unya sa sunod tuig sa boxing sa ilang subject sa PE alang sa mga lalaking tinun-an sa high school.

 Ang lakang sa konseho miani og nagkadaiyang reaksiyon diin adunay uyon ug supak sa maong resolution.

 Matud pa ni Johnrey (tinun-an sa High School) nga dili tanang bata mahiligon sa boxing ilabi na ang mga masakiton, hinungdan nga dili angayan nga iapil sa PE ang boxing.

 Samtang si Mark (usa ka 4th year student sa HS) uyon sa maong lakang gumikan kay makahatag kini og maayong sinugdanan sa ila unyang tinguha sa paglambo sama sa natagamtaman ni Pacquiao ug kini nag-agad lamang sa kasinsero sa usa ka bata nga mosulod sa natad sa pamoksing.

 Base sa kasaysayan sa boxing kasagarang mga kampiyon niini naggikan sa Kabisay-an ug Mindanao ug ang kadaghanan niini mga residente sa lalawigan sa Sugbo. – BANAT NEWS