Driver gipatay sa pasahero

CEBU, Philippines - Patay ang usa ka drayber sa habal- habal human kini pusila sa iyang pasahero didto sa Sitio Township, Barangay Poog, dakbayan sa Toledo sa miaging hapon.

Ang biktima naila nga si Christian Selgas, 22, nga taga Sitio Basurahan, barangay Das, dakbayan sa Toledo, samtang ang kriminal padayon pang gipangita sa kapulisan.

Sa inisyal nga imbistigasyon sa kapulisan, nasayran nga ang kriminal mipara ug misakay sa motor sa biktima gikan sa barangay Das padong sa barangay Poog ug didto na pusila sa kriminal ang biktima.

Nakaangkon og usa ka samad pinusilan sa ulo ang biktima nga maoy hinungdan sa iyang hinanaling kamatayon.

Napunitan sa kapolisan sa dapit diin nahitabo ang pagpamusil ang duha ka kabhang nga bala sa kalibre 45 nga pistola ug usa ka putos nga plastic nga gituohang shabu.

Hangtod karon wala pay giya ang kapolisan bahin sa ngalan sa kriminal, samtang ang patay’ng lawas sa biktima gipaubos pa karon sa awtopsiya.  – BANAT NEWS