CEBU, Philippines - May pagtugot ni Mayor Socrates Fernandez sa dakbayan sa Talisay ang gipatukod nga building ni Kapitan Teodoro “Belo” Belleza sa barangay Poblacion, sa maong dakbayan.
Kini ang gibutyag ni Belleza sa Banat News agi og tubag sa reklamo sa mga molupyo batok sa iyang gipatukod nga edipisyo diha sa ilang barangay.
Ang mireklamo mao ang magtiayong Enrique ug Patricia Fernandez ug Maria Bulagao nga ilang silingan.
Matud pa ni Belleza, miuyon si Mayor Fernandez sa iyang ipatukod nga building kay dili man kini iyang kaugalingon kundi alang kini sa ilang barangay nga mao ang Material Recovery Facility (MRF) ang usa sa tigomanan sa mga basura nga gimando sa kagamhanan.
Anha diha bahiga ang mga basura nga malata ug dili malata nga gikinahanglan kaayo sa matag barangay.
Miingon usab si Belleza nga tupad sa maong MRF maghimo usab sila og gamay nga fishpond o pasong lang ilang gamiton alang sa isda nga tilapia.
Midugang si Belleza nga nakahigayon siya pagmontar ning maong proyekto tungod kay may kuwarta silang giandam niini sama sa P300 mil nga premyong nadawat sa barangay dihang midaog kini makaduha ka higayon isip labing hinlo nga barangay sa tibuok Talisay.
Alang kang Belleza nga mas labi pang mamintenar ang kahinlo ug katahom sa Poblacion karong may MRF na sila ug gituohan niya nga dili na mailog ang maong dungog sa ubang barangay sa dakbayan kun mamintenar nila ang kalinis sa ilang barangay. – BANAT NEWS