Malacañang sa Sugbo gamitong PNoy

CEBU, Philippines - Subling gamiton ni Presidente Benigno Simeon Aquino III ang Malacañang sa Sugbu isip iyang buhatan panahon nga nia dinhi ang pangulo sa nasud.

Kini maoy gipahibalo ni Mayor Michael Rama human mismong si Aquino nga iyang gikahinabi niadtong Miyerkules sa gabii didto sa kaulohan.

Si kanhi presidente ug karong Pampanga Representative Gloria Macapagal Arroyo maoy migamit sa karaang buhatan sa Cebu Bureau of Customs isip Malacañang sa Sugbu.

Una na nga gihangyo ni Rama kaniadto nga himuong heritage area ang maong dapit kung dili kini gamiton sa presidente.

Apan karong gipahibalo mismo sa pangulo nga gamiton gihapon niya kini isip iyang buhatan mas makapuno kini sa atraksiyon sa siyudad. Pipila lamang ka metros ang gilay-on sa maong buhatan diha sa Fort San Pedro nga usa sa mga tourist spot sa dakbayan ingon man sa Magellan’s Cross atbang sa city hall. Nasayran usab nga dunay kalihukan nga himuon ang presidente sa Malacañang sa Sugbo sa higayon nga mobisita kini sa unang bahin sunod tuig.

Kahinumduman nga niadtong Hulyo, nagtinguha ang mga kadagkoan sa Bureau of Customs-Port of Cebu sa pagkuha og balik sa Malacañang sa Sugbu.

Sa laing bahin, nagpadayon karon ang pagpanindot sa Plaza Independencia   isip kabahin sa city beautification nga programa sa siyudad. Ang maong proyekto nakatampo usab sa kanindot sa palibot sa Malacañang sa Sugbu sanglit nagtupad raman ang nahimutangan niini. – BANAT NEWS