Carnapper gigutom

CEBU, Philippines - Ang kagutom maoy gihimong hapin sa usa ka carnapper nga hinungdan nganong gisakiyo kuno niya ang usa ka motorsiklo sa igsoon og polis didto sa dakbayan sa Lapulapu sa milabay’ng gabii.

 Ang suspetsadong carnapper nga nadakpan sa kapolisan sa dakbayan sa Sugbo mao si Erman Rapsing, hingkod, nga taga Brgy. Aroroy lalawigan sa Masbate ug walay permanenteng address dinhi sa Sugbu. Si Rapsing nasikop sa mga sakop sa Cebu City Police Office Mobile Patrol division samtang mipyesa-pyesa kini sa motorsiklong kinarnap niya sa daplin sa dalan Panganiban, sa Brgy. Pahina Central sa dakbayan sa Sugbo.

Ang tag-iya sa maong motorsiklo mao si Romero Jumao-as igsoon ni SPO2 Rolito Jumao-as sa kapolisan sa Lapulapu.

Bisan sa pangatarungan sa suspetsado nga gigutom kuno siya hinungdan nga gikawat niya ang motorisklo ni Jumao-as, wala gayud siya pasayloa sa biktima.

Ang kiha nga carnapping maoy gipasaka sa biktima batok kang Rapsing. Ang motorsiklo ni Jumao-as gi-parking sa kilid sa City Auditorium sa dakbayan sa Lapulapu nga nag-ungot ang yawe.

Dihang nakit-an kini sa suspetsado, gisakyan dayon ug gipadagan ngadto sa Panganiban street sa dakbayan sa Sugbo diin didto niya kini bungkaga , ug gumikan sa dakong dimalas nadakpan ra gyud siya sa kapolisan ug karon nagtingkagol na siya sa prisohan. – BANAT NEWS