Mipatay sa igsuon gipatay sad

CEBU, Philippines - Gipusil patay ang usa ka drayber sa habal-habal kinsa suspek usab sa pagpatay sa iyang kaugalingong igsuon sa milabay’ng tuig samtang kini paingon mogarahe sa iyang motorsiklo sa ilang pinuy-anan sa Highway Looc siyudad sa Danao niadtong Miyerkules sa alas 9:45 sa gabii.

Patay diha-diha human makaangkon og samad pinusilan sa ulo ug tangkugo si Roberto Mata Villaester, 35, molupyo sa nahisgutang lugar samtang wala pa mailhi ang nagbinugtong nga mamumuno.

Matud ni SPO4 Edgar Gomez sa Danao City Police Station dihang nahinabi sa Banat News, subay sa imbestigasyon ang biktima paingon na untang mogarahe sa iyang motorsiklo sa silong sa pinuy-anan dihang miabot ang gikatahapang luwan og motorsiklo.

Sumala pa nga mikanaog ang mamumuno ug miduol sa biktima dayong gidul-itan pagpusil sa ulo si Villaester samtang kini nagtalikod, human matumba giusban kini pagpusil sa maong lalaki nga gituohang hinungdan sa samad pinusilan sa liog sa biktima. Pagkahuman niini daling misibat pahilayo ang gikatahapan sakay sa motorsiklo samtang ang biktima namatay gyud dangtan og pipila ka gutlo.   

Gituohan sa kapulisan nga posibleng dunay personal nga nakaaway ang biktima sanglit giingong daghan nang nakabangi si Villaester sa wala pa ang hitabo, gawas pa niini, kaniadto napatay sa biktima ang kaugalingong igsuon. – BANAT NEWS