Rama nabalaka sa umento sa pletihan

CEBU, Philippines - Nabalaka si Mayor Michael Rama sa hagit sa Cebu Integrated Transport Services Cooperative (Citrasco) ug sa Alyansa sa Nagkahiusang Drayber-Operator Alang sa Reporma (Andar) nga nanawagan nga patas-an ang plitehan sa PUJ og dugang P1.50 gumikan sa kataas na karon sa presyo sa gasolina.

   Matud pa sa mayor nga kinahanglang susihon sa maong grupo sa tranportasyon kung makiangayon ba ilang hangyo ug dili ba kini makaapekto sa ubang butang.

“Dili man ko supak sa ilang hangyo, depende ra gyud na sa ilang rason kung makiangayon ba. Kay kung duna man gu’y pagtaas sa plitehan, dako ang posibilidad nga motaas usab ang presyo sa ubang panginahanglanon,” nagkanayon si Rama.

Kahinumduman nga gipadayag sa miaging adlaw sa tsirman sa Citrasco nga si Ryan Benjamin Yu nga naglaraw silang patas-an ang plitehan ug ilang panghinaut nga masabtan sila sa publiko.

Gawas sa pagsaka sa presyo sa mga produktong petrolyo, nagkadako usab ang gasto sa mga operators ngadto sa maintenance sa ilang mga sakyanan gumikan sa kamahal na usab karon sa presyo sa mga spare parts sa sakyanan.Ang Citrasco ug Andar dunay liboan ka mga sakop sa Metro Cebu.

Apan usa ka magtutudlo sa usa ka kolehiyo dinhi sa siyudad nga si Ace Cavales misaway sa laraw sa Citrasco ug matud pa niya nga dunay ubang mga drayber karon nga maningil og P7 imbes P6.50 unta ang saktong plitehan.

“Andam hinuon ko maminaw sa habig sa mga drayber pero kung magpataas man sila dapat, himuon na lang og P7, dili ko uyon anang P8,” sumala pa ni Cavales.

Dugang pa niya nga dunay mga drayber nga dili mohatag og diskwento ngadto sa mga estudyante ug sa mga senior citizen. – BANAT NEWS