Tanod gisanggot, patay

CEBU, Philippines - Patay diha-diha dayon ang usa ka tanod human kini gisanggot sa liog sa iya rang igsuong usa usab ka barangay tanod diha sa sitio Binatak barangay Cansalonoy sa lungsod sa Ronda pasado alas 4:00 kagahapon sa hapon.

Ang biktima giila nga si Benerando Carillo, 30, molupyo sa nahisgutang dapit. Samtang ang suspetsado nga iya ra usab nga maguwang giila nga si Anecito Carillo, 38.

Sa pakighinabi sa Banat News kang PO3 Emerito Sansan giingong nagkaaway ang managsuon tungod usab sa panag-away sa ilang tagsa-tagsa ka mga asawa.

Giingong nag-away ang duha ka mga ginang human pasanginli sa asawa sa biktima ang sinagop nga anak sa suspetsado nga maoy milugos sa ilang kaniadto 4-anyos pa nga anak upat na ka tuig ang nakalabay.

Miabot sa barangay ang maong panaglalis apan nahusay ra usab ang duha ka habig. Apan wa gyud matuldoki ang maong panagbingkil tungod kay sa panahon nga mangahubog ang managsuon kanunay silang mag-away. Giingong kanunay’ng hagiton sa biktima og away ang suspek.

Ug kagahapon samtang nanghabas og humay ang suspetsado sa dapit diin nahitabo ang krimen gihagit na usab kini sa biktima og patay.

Gibadlong pa unta ang biktima apan wala mopatuo hinungdan nga nagbuno ang duha ug nianang tungura gisanggot sa suspek ang liog sa biktima nga nakaingon sa hinanali niining kamatayon.

Human sa hitabo boluntaryong mitahan sa iyang kaugalingon ang suspetsado ngadto sa konsehal sa lungsod nga si Alfredo Villafuerte kinsa mao nay mi-turnover kaniya sa Ronda Police Station. - ug Maricel Regasajo (BANAT NEWS)