Carnapper sa Manila sikop dinhi

CEBU, Philippines - Mokabat sa P580,000 ang girekomendar nga piyansa sa korte sa Manila alang sa temporaryong kagawasan sa usa ka tawo nga nadakpan sa kapolisan sa dakbayan sa Mandaue sa kasong carnapping sa miaging hapon.

Ang nadakpan nga si Glindo Anong, hingkod, nga taga Antipolo sa Santa Cruz, Manila , usa sa giilang labing pinangita sa kapolisan sa Manila apan nadakpan kini sa kapolisan sa Mandaue didto sa reclamation area sa barangay Subangdaku, sa maong dakbayan.

Si PO2 Rosendo Cabrera nga maoy nagdakop sa suspetsado miingon nga si Ritchie Macabiquil nga maoy operation manager sa Arley Cargo Forwarding sa reclamation area maoy nangayo og panabang sa ilang buhatan.

Matud pa ni Cabrera nga ilang gibasehan ang warrant of arrest nga giluwatan ni Judge Jesus Bursamin sa National Capital Region Branch 168 sa dakbayan sa Pasig aron pagsikop sa suspetsado.

Si PO2 Cabrera miingon nga ang duha ka mga kaso nga giatubang sa maong dinakpan sa korte sa Manila naglakip sa paglapas sa Anti Carnapping Act of 1972 ug qualified theft.

Dugang pa niya nga si Macabiquil maoy nakasigpat sa maong suspetsado didto sa reclamation area ug dali kining nangayo kanila og panabang aron masikop.

Ang maong dinakpan nga gibalhog karon sa Presinto 2 sa Subangdaku Police Station gikatakdang dad-on sa sunod semana ngadto sa Manila aron ikapresentar kini sa korte. (BANATNEWS)