15 anyos gihimong drug runner

CEBU, Philippines - Usa ka 15-anyos nga batang babaye ang nadakpan ug nakuhaan og napulo ka paketeng shabu niadtong kaadlawon sa adlaw’ng Domingo diha sa barangay Ermita ning dakbayan.

Si Jocelyn (tinuod ngan gipugngan sa Banat News) kasamtangan nagpuyo diha sa Ermita apan lumad nga taga Talibon Bohol nadakpan sa mga sakop sa Anti-Street Hoodlums Operating Team (A-SHOT) sa Cebu City Police Office (CCPO) gipangulohan ni SPO2 Maximo Lapa nga nagpatrolya niadtong higayona.

Matud pa sa kapulisan nabantayan nila kining adunay gikaestoryang lalaki ug dunay gitunol nga pinutos nga ilang gidudahang ang sulod shabu hinungdan nga ilaha kining giduol apan nakaikyas ang lalaki. Sa ilang pagsusi sa bata nakuha gikan kaniya ang napulo ka paketeng shabu.

Ang bata kasamtangan gitanggong sa karsel sa CCPO ug gikatakdang pasakaan og kaso samtang gipaabot usab nga i-turnover sa kapulisan ngadto sa buhatan sa Department of Social Welfare and Development.

S Jocelyn dihang nahinabi sa Banat News mitug-an nga igo lang siya tigdawat sa shabu nga gisugo sa iyaan sa iyang amiga.

Samtang sa pikas bahin nakuhaan og .357 revolver ug dunay tulo ka buhing bala si Jhay Paul Bacornay, 18, sakop sa Bloods gang nga taga Kalubihan, Banawa, sa Guadalupe sa grupo gihapon ni Lapa niadtong Domingo sa tungang gabii diha sa Sanciangko St., barangay Kamagayan. (BANATNEWS)