Gullas midayeg kang Pacquiao

CEBU, Philippines - Mapasigarbuhon kaayo si Kongresista Eduardo Gullas sa unang distrito sa lalawigan sa Sugbo sa kadaugan ni Manny Pacquiao batok kang Antonio Margarito niadtong Domingo.

Matud pa ni Gullas nga sa iyang kalipay iyang gitextan si Pacquiao ug iya kining gidayeg nga sa ika-11 ka hugna sa maong sangka sa ring, gipakita niini ang iyang tawhanong kaluoy kang Margarito.

Kini sa dihang iyang gisinyasan ang referee nga pahunongon na si Margarito aron dili masobrahan sa kabun-og.

Labing gidayeg sa Kongresista sa unang distrito sa lalawigan dihang sa iyang victory statement, gipahayag ni Pacquiao nga ang “boxing is not for killing” o ang boxing dili pangpatay.

Kini agi’g tubag ni Pacquiao sa mga interview ug pangutana nganong wala niya kulataha og maayo si Margarito.

Busa alang kang Gullas ang pagkamapainubsanong kinaiya nga gipakita ni Pacquiao sa tibuok kalibotan, angay na mahimong   sumbanan sa pagkamaayong kinaiya sa tawo nga angayang kopyahon sa mga henerasyon karon.

Matud pa ni Gullas nga ang kadaugan ni Pacquiao kadaugan usab sa nasud nga Pilipinhon. (BANATNEWS)