Acetylene gang sikop

CEBU, Philippines - Napakgang ang plano sa duha ka gitumbok nga sakop sa Acetylene Gang nga buot untang biktimahon ang usa ka pawnshop dinhi sa dakbayan human sila gidakop sa mga sakop sa Theft and Robbery Section (TRS) sa Cebu City Police Office sa miaging pasado alas-7 sa gabii diha sa ilang giabangang pension house nga nahimutang diha sa Osmeña Boulevard ning dakbayan.

Ang mga nadakpan giila nga mao sila si Kenneth Coplanga ,47, taga Besao, La Trinidad, Benguet ug Madrid Batnag ,40, taga Sagada La Trinidad, Benguet.

Nakuha gikan sa lawak sa duha sa giabangang pension house ang bara-de kabra, heavy duty screw driver, manual drill, usa ka portable nga tanke sa liquified petroleum gas (LPG) ug twin hose acetylene cutter ug pipila ka resibo sa pawnshop ingon man ang giingong papel nga gituohang gisuwatan sa ilang plano sa pagpangawat.

Lakip sa nakuha gikan sa duha ang tagsa ka pakete sa gidudahang shabu ang sulod niini diha sa ilang pitaka ug bulsa sa pantalon.

Ang duha ka suspetsado nadakpan tungod sa usa ka impormanteng mipahibalo sa kapolisan kabahin sa duha nga kadudahan ang linihokan nga magpunay og paniid duol sa usa ka dakong department store diha sa Colon Area sulod sa pipila na ka adlaw.

Tungod niini daling giadto sa kapolisan ang maong dapit ug gidakop ang duha ug nakuhaan sa maong shabu, tungod niini gisusi usab sa kapolisan ang pension house diin mag-abang ang duha nga tupad ra sa Gemmary Pawnshop.

Diha sa maong lawak nakit-an ang maong mga kahimanan nga gigamit sa grupong acetylene gang.

Si Sr. Supt. Melvin Ramon Buenafe, hepe sa CCPO mitug-an nga ang duha miangkon nga target nila mao ang mga pawnshops sama sa nahitabo didto sa Dumaguete City.

Gani nagkanayon siya nga sa ilang gihimong imbestigasyon sa duha mitug-an kaniya nga adto unta sila moagi sa second floor sa ilang giabangan nga pension lahos ngadto sa pawnshop.

Nunot niini gipahimangnuan ni Buenafe ang mga tag-iya’g pawnshop nga kinahanglang magbantay ilabi na kung weekends diin sagad mangigo ang grupo sa acetylene gang.

Ang ilang modus mao nga moabang sila sa tapad sa pawnshop aron lungkabon panahon nga kini manirado ug walay gwardiya. (BANATNEWS)