Nasunogan sa Looc padayong gipakaon
CEBU, Philippines - Gihatagan og pagkaon nga molungtad og tulo ka adlaw ang taga sitio Bildohan sa barangay Looc, dakbayan sa Mandaue kinsa nabiktima sa sunog sa miaging adlaw.
Si Jocelyn Domingo sa social welfare office sa maong dakbayan nga nahinabi sa Banat News miingon nga gawas sa mga pagkaon, ang mga biktima nakadawat usab og mga galamiton sama sa banig, habol, balde, planggana ug uban pa nilang gikinahanglan.
Matud pa ni Domingo nga ang mga biktima naglakip sa 37 ang mga tag-iya og balay, samtang 16 ang nangabang lang.
Si Domingo miingon nga kasagaran sa mga biktima anaa ra magtolda sa mga nasunog nilang puwesto.
Sa nasayran nga ang luna nga gipuy-an sa mga biktima iya sa kagamhanan sa dakbayan.
Hinuon si Mayor Jonas Cortes nga nahinabi sa mga tigbalita miingon nga dili angay nga mabalaka ang mga biktima sanglit hatagan gihapon niya sila og higayon nga makapabarog sa ilang balay sa maong luna.
Apan kinahanglang padak-an ang karsada sa maong lugar aron makasulod ang mga bombero sa panahon nga may sunog. (BANAT NEWS)
- Latest
- Trending
