2 kapitan nakalingkawas sa ambush

CEBU, Philippines - Duha ka mga midaog nga barangay kapitan nga gikan pa manumpa sa ilang katungdanan niadtong Biyernes sa hapon ang gi-ambush apan swerteng wala mangaigo ug nakadagan palayo.

Ang pagpamanhig nahitabo diha sa barangay Bancasan lungsod sa San Remegio samtang sila si barangay kapitan Noli Latsaron Cataga sa barangay Sab-a ug barangay kapitan Celerino Cabague Mancao sa barangay Anapog padulong na manguli.

Ang duha mibutyag nga duha ka wala mailhing mga lalaking luwan sa usa ka motorsiklo nga pulos nagsuot og bonnet (ski mask) maoy mipaulan og bala kanila.

Base sa imbestigasyon sa kapolisan sa lungsod sa San Remegio nasayran nga ang biktima gikan sa San Remegio Sports Complex tungod sa gipahigayon nga oathtaking.

Sa ilang pag-uli miangkas si Mancao sa motorsiklo ni Cataga ug samtang nagdagan pag-abot sa usa ka plantasyon sa katubhan giingong kalit nga mi-overtake ang usa ka motorsiklo nga giluwanan sa mga gikatahapan.

Tungod niini daling mihunong si Cataga ug diha-diha kalit silang gipaulanan og bala sa mga gikatahapan hinungdan nga dali silang miambak sa motorsiklo ug mikaratel og dagan sa katubhan. Ang duha milahos og sumbong ngadto sa kapolisan ug sa pag-abot sa mga polis wala na diha ang mga namusil apan nakuha diha sa crime scene ang motorsiklong gisakyan sa mga kapitan, usa ka buhing bala, usa ka antipara, usa ka magazine sa kalibre .45 nga adunay upat usab ka buhing bala niini.

Samtang matud pa sa hepe sa kapolisan sa lalawigan sa Sugbo, Sr. Supt. Erson Digal nga mopadala siya og usa ka team sa Special Reaction Unit aron maoy makatabang sa pagmentinar sa kahapsay ug kalinaw sa maong lungsod.

Matud pa ni Digal nga tukuron nila ang usa ka task force nga maoy mopahigayon sa halawom nga imbestigasyon kalabot sa maong ambush incident nga panguluhan ni Sr. Insp. Rubin Cuizon. Gituohang politika ang hinungdan sa maong pagsuway pagpatay sa duha ka kapitan. (BANAT NEWS)