Daghan og patik sa lawas gi-salvage

CEBU, Philippines - Patay’ng lawas sa usa ka tawong naputos og mga patik ang kalawasan nga gituohang biktima sa salvage ang napalgang nagbuy-od sa awaaw nga lugar sa sitio Hilltop sa barangay Tawason, dakbayan sa Mandaue alas 8:45 ang takna sa miaging Biyernes sa gabii.

Ang maong patay’ng lawas giila sa mga kabanay nga mao si Erwin Bernard Macasait, taga Bacayan, dakbayan sa Sugbo ug manindahay og puto sa maong dapit.

Si Macasait nakaangkon og samad pinusilan sa luyong bahin sa ulo nga milapos sa agtang nga nakaingon sa hinanali niining kamatayon.

Si PO3 Tirso Plania sa Presinto 6 sa Canduman Police Station nga nahinabi sa Banat News miingon nga diha na sa punerarya giila sa mga kabanay si Macasait kinsa giingong manindahay og puto.

Dugang pa ni Plania nga usa ka residente nga nagpuyo 400 metros gikan sa dapit diin mapalgi ang patay’ng lawas mitug-an kanila nga nakabati sila og andar sa motorsiklo nga mihunong sa maong dapit.

Ug pipila ka gutlo ilang nabati ang nagsunod-sunod nga buto sa armas ug human niini mipabulhot kini og padagan pahilayo sa maong dapit ang nadunggang motorsiklo.

Nakuha diha sa crime scene ang duha ka mga kabhang sa kalibre .45 nga armas, tsinelas ug bonnet nga color blue nga gibadlisan og puti. (BANAT NEWS)