Koreano nagbitik sa liog

CEBU, Philippines - Usa ka Koreano ang gidudahang naghikog kagahapon sa usa ka pension house sa barangay Capitol Site pasado alas 5:40 sa milabay’ng hapon.

Ang naghikog giilang si Cho Dong Sun nga mas naila sa alyas “Jong Dongean”, 46, usa ka negosyante ug lumad nga taga Seoul, South Korea.

Sa imbestigasyon sa Crime Scene Investigation (CSI) nasuta nga ang higala niining babaye nga ginganlan og Liza Ramos maoy nakadiskubre sa patay’ng lawas ni Cho sulod sa lawak nga nagbitay na ug may hikot nga electrical wire diha sa iyang liog ngadto na sa aparador.

Sumala pa sa mga imbestigador sa Homicide Section base sa pamahayag ni Ramos gikan pa silang duha ni Cho sa usa ka Korean restaurant sa IT Park apan iyaha kining gibiyaan tungod kay makigkita sa iyang igsuon sa Alumnus sa barangay Basak-San Nicolas.

Apan sa iyang pagbalik diha sa pension house ni Cho wala siya ablihi niini ug nakakandado ang pultahan hinungdan nga nanawag siya sa mga kawani sa maong pension house aron maablihan.

Dihang naablihan nakugang nalang sila sa ilang nakita nga nagbitay na si Cho ug wala nay kinabuhi. Dali silang mitawag sa Emergency Rescue Unit Foundation apan patay na gyud kini.

Sa pakighinabi sa Banat News ni PO3 Archile Sanchez sa Fuente Police Station nga usa sa mga miresponde mibutyag nga adunay nakit-ang gituohang suicide note diha sa higdaanan. (BANAT NEWS)