CEBU, Philippines - Mapasigarbuhon si bokal Agnes Magpale sa pagkatudlo sa iyang anak nga kanhi usab board member ug broadcaster isip bag-ong undersecretary sa Department of Energy kon DOE.
Gihulagway ni Bokal Magpale si Ina Magpale Asirit nga haom sa maong gitahas nga katungdanan ug andam usab kini og tagana nga moserbisyo sa mga Pilipinhon ilabina gyud sa mga Sugboanon.
Nasayran nga ang Sugboanong Energy Secretary Rene Almendras igsoon usab ni bokal Magpale ug uyo-an ni Asirit. Nunot niini si Asirit gitakdang mo-anhi sa Sugbo karong Sabado aron pagtambong sa general assembly sa CEBECO nga ipahigayon sa siyudad sa Danao.
Nasayran nga una nang nadawat ni Asirit ang iyang appointment nga pirmado ni Presidente Benigno Noynoy Aquino III niadto lang miaging adlaw diin gisunod dayon ini ang iyang pagpanumpa sa maong katungdanan didto sa Malakanyang.
Si Asirit nagsilbi usab kaniadto nga board member sa 5th district sa Sugbo nga maoy mihulip sa iyang inahan nga board member dihang nahurot ang tulo ka sunod -sunod nga termino niini.
Apan pagkahuman sa iyang termino wala na magpasubli pa ug misulod sa media isip co-anchor sa DYAB. (BANATNEWS)