Bag-ong hepe sa bombero milingkod na

CEBU, Philippines - Pormal na nga milingkod isip bag-ong chief fire marshall sa Cebu City Fire Department   si Aderson Comar . Nagkanayon si Mayor Michael Rama nga nag-agi siya og daghang konsultasyon sa wala pa niya mapili si Comar ug iyang nasayran nga pito na kini ka tuig nga nagserbisyo sa National Capital Region ug maayo usab ang track record niini.

Nagsugod si Comar sa Region 9 ug nahimo usab siya nga fire marshall sa nagkadaiyang dapit sa nasud sukad niadtong 1988.

Kahinumdoman nga sa tunga-tungang bahin pa sa Setyembre gipadala ni Rama ngadto sa buhatan ni Kalihim Jessie Robredo sa Department of Interior and Local Government (DILG) ang iyang rekomendasyon ni Comar.

Usa sa gitambag ni Rama kang Comar puhon mao ang pagpalig-on og maayo sa puwersa sa fire department partikular na sa dinalian nga pagresponde sa mga dagkong sunog.

Samtang gipadayag ni Comar nga sulod niining semanaha, magsugod na siya sa pagsusi sa mga gamit sa city fire department ug mo-request siya og fire truck aron mapakusgan ang ilang puwersa kung dunay mga operasyon.

“Sa pagka-karon , kung unsay naa nato nga gamit , mao na ang atong gamiton. Andam mi mo-request sa mayor kung duna’y panginahanglanon nga equipment.   Dili man gud na madali-dali ang pag-request kay kabalo man ta nga nag-agad ra ta sa budget ,” matud pa ni Comar.   (BANATNEWS)