LTO sa Talisay ibalik sa city hall

CEBU, Philippines - Gibutyag ni Kongresista Eduardo Gullas sa unang distrito sa Sugbo nga ang buhatan sa Land Transportation Office (LTO) sa dakbayan sa Talisay ibalik na sa kanhing nahimutangan niini kung mahuman na og pahimutang ang mga computer.

Ang buhatan sa LTO anaa karon mahimutang sa South Central Square (SCS) sa barangay Lawaan I, ug ibalik kini ngadto sa kanhing nahimutangan sa Talisay City hall sa barangay Mohon agi og pagtuman sa mando sa Department of Transportation and Communication (DOTC) matud ni Gullas.

Niadtong Oktubre 20, 2010 si Jose de Jesus, kalihim sa DOTC mipadala og memorandum ngadto kang Virginia Torres, assistant secretary sa LTO.

Atol sa gipahigayong press conference niadtong milabay’ng adlaw diha sa buhatan ni Gullas sa University of the Visayas sa dakbayan sa Sugbo mibutyag kini nga sa maong memorandum, si de Jesus mimando kang Torres sa pag-andam sa mga gikinahanglang rekisitos sa pagpabalik sa buhatan sa LTO ngadto sa Talisay diha sa city hall.

Sa maong adlaw gihapon si Torres mipadala usab dayon og memorandum ngadto kang LTO-7 Regional Director Raul Aguilos nga nagmando sa pag-implementar sa nahisgutang kamandoan ni de Jesus.

Kahinumdoman nga niadtong buwan sa Nobiyembre 2008 ang buhatan sa LTO nabalhin ngadto sa SCS nga gipanag-iya ni Mat Velasco ug si Gullas misupak niini.

Gumikan sa kalagot ni Gullas gihulga niini ang DOTC nga pugngan ang budget sa maong ahensiya tungod sa pagkabalhin sa buhatan sa LTO ngadto sa SCS. Ang LTO sa SCS wala magbayad sa puwesto, gawas sa tubig, suga, telepono, ug security guard .

Usa sa mga hinungdan nga walay gusto si Gullas sa nahimutangan sa LTO karon mao nga dili pabor kaayo sa tanang may sakyanan ug labaw sa tanan dili pabor sa gobyerno. (BANATNEWS)