Tulo ka taxi driver gitulis

CEBU, Philippines - Tulo ka mga drayber sa taxi ang nabiktima sa tulo ka managlahing insidente sa pagpanulis sa ilaha rang mga pasahero dinhi sa Metro Cebu sa miaging gabii.Unang insidente sa tulis nahitabo diha sa Pier 7 sa North Reclamation Area sa barangay Mabolo, ikaduha diha sa sitio Sagay sa Kasambagan sa Mabolo gihapon ug ang ikatulo nahitabo sa barangay Subabasbas sa dakbayan sa Lapulapu.

Si Iking Villanosa ,46, taga Mambaling midangop sa kapulisan human ang iyang gimanehong Café Taxi gidala sa nagbinugtong tulisan nga mitulis kaniya.

Sigun pa sa asoy ni Villanosa nga misakay kaniya ang usa ka lalaki didto sa Mandaue ug nagpahatud sa Pier-7 apan pag-abot niya sa nahisgutang lugar gitionan siya og pusil ug mideklarar og tulis.

Nakuha sa biktima ang P740 nga kinitaan, apan ang nakapait kay gipakanaog siya sa tulisan ug gidala ang iyang taxi.

Samtang ang ikaduha nga biktima sa pagpanulis mao si Lito Vastesneo, 40, taga Magsaysay St. sa Hipodromo ug drayber sa Mecaella Taxi. Si SPO2 Elmer Tanjay sa Mabolo Police station mibutyag nga si Vastesneo gisakyan og duha ka lalaki diha sa M. Velez sa barangay Guadalupe ug nagpahatud sa Sarrosa Hotel sa Kasambagan apan pag-abot nila sa sitio Sagay, ang usa sa duha mition kaniya og kutsilyo dayong deklarar og tulis ug nakuha ang iyang P700 nga iyang kinitaan.

Sa laing bahin, nagkurog sa kakulba ang laing drayber sa taxi nga si Alfredo Daabay, 27, nagmaneho sa EYE Taxi human gitulis sa duha niya ka pasahero sa barangay Subabasbas dakbayan sa Lapulapu sa milabay’ng gabii. (BANATNEWS)