Tulisang nadakpan gidugok sa biktima

CEBU, Philippines - Mga biktima sa tulis kaniadto sa duha ka mga suspetsadong tulisan nga nasikop sa mga polis mitungha diha sa Talisay City Police Station niadtong Huwebes sa hapon ug kagahapon.

 Tulo sa mga biktima kinsa mi-recover sa ilang mga bag ug ubang personal nga mga butang mao sila si Nathaniel Dela Peña, 52, taga BF Homes Subdivision, barangay Upper Mohon, dakbayan sa Talisay ug usa ka salesman, Zaiberth Nazareth, 38, taga Palm View Village, barangay Tabunok ug usa ka magtutudlo sa Pardo Elementary School ug Elain Ocampo, 40, taga Lemon Ville, barangay Cansojong.

Si Dela Peña ug Nazareth miila kang Jeffrey Paran, 30, nga taga barangay Poblacion, dakbayan sa Naga kinsa dunay laing kauban nga mitulis kanila.

Si Nazareth mibutyag ngadto sa mga polis nga nabiktima siya sa pagpanulis niadtong Oktubre 26, 2010 diha sa atubangan sa ilang balay.

Si Ocampo miila sa usa sa mga motorsiklo nga na-recover gikan sa mga tulisan nga maoy gisakyan dihang gitulis siya apan wala na siya makahinumdom sa adlaw sa hitabo.

Kahinumdoman nga si Johnly Abangan napusilan ni PO1 Jessieben Gumandal human niya tulisa ni Paran si Myla Bariquiot niadtong Miyerkules sa gabii diha sa sitio Mananga, Tabunok.

Si Paran nakasibat sa maong hitabo apan nasikop kini niadtong Huwebes sa hapon sa barangay Langtad, dakbayan sa Naga sa gipahigayong hot pursuit operation sa mga polis.

Si Abangan miangkon ngadto sa mga polis nga sila maoy mitulis sa Petron Gasoline Station diha sa barangay Lawaan I ug sa Nemeño Reach.Com Internet Café and Training Center sa barangay Tabunok.

Kahinumdoman usab nga si Superintendent Henry Biñas mibutyag nga niadtong tuig 2009 si Paran nasikop nila ug napriso kini diha sa Talisay City Jail tungod sa kasong robbery hold-up ug bag-ohay lang kining nakagawas.

Kagahapon sa hapon si Paran gipasakaan og kasong robbery hold-up samtang si Abangan robbery hold-up ug kalapasan sa Comelec gun ban.

Matud ni Biñas nga gihuwat pa nila ang ubang mga nabiktima sa mga suspetsado aron makuhaan nila og mga affidavit aron madugangan pa ang kasong ipasaka batok sa mga suspetsado.

Sa laing bahin, gawas sa rekomendasyon ni Senior Superintendent Erson Digal, hepe sa Cebu Provincial Police Office (CPPO) alang sa pasidungog ni Gumandal ang konseho sa dakbayan sa Talisay nagplano usab nga mopasar og resolusyon alang sa commendation sa nahisgutang polis tungod sa pagtuman niini sa iyang trabaho.

Si Bise Mayor Alan Bucao mibutyag sa Banat News kagahapon nga ang Konseho mopasar og resolusyon karong Lunes atol sa ilang special session alang sa commendation ni Gumandal.

Matud ni Bucao nga makig-meeting siya sa komitiba sa kahapsay ug kalinaw ug moadto usab siya kang Mayor Socrates Fernandez kay aron mausa nila og tunol ngadto sa maong polis kung ugaling adunay pasidungog nga ihatag ang mayor.  (BANATNEWS)