150 banyerang isda nasakmit sa Argao

CEBU, Philippines -  Moabot ngadto sa 150 ka banyera nga mga isdang Bilong-bilong ang nasakmit sa mga sakop sa Bantay Dagat ug kapulisan human madakpi ang usa ka panagatan nga gipanag-iya sa usa ka mayor sa Siaton, Negros Oriental gumikan sa illegal nga pagpangisda didto sa kadagatan sa barangay Bulasa lungsod sa Argao alas 10 sa gabii niadtong Huwebes.

Ang gidakop nga panagatan mao ang F/B Ara-2 nga dunay kauban nga laing bangka ug usa ka light boat nga dunay 20 ka mga tripulante nga gipangulohan sa kapitan nga si Gilbert Vildosola, 50, taga Cabangajan, Siaton Negros Oriental. Giingong ig-agaw ni Siaton mayor Alberto Ator si Vildosola.

Matud ni PO2 Von Tecson sa Argao Police dihang nahinabi sa Banat News ang mga sakop sa Bantay Dagat pinangulohan ni Anthony Villegas inabagan ni PO1 Marvin Chin milusad og operasyon human mamatikdi ang presensiya sa maong panagatan nga illegal nga nangisda sa dagat sa barangay Bulasa.

Sa pagkasakmit sa maong panagatan nakuha ang daghang mga binanyera nga isda hinungdan nga ilaha kining gisakmit ug gipanghatag ngadto sa mga molupyo sa maong lugar.Matud ni Tecson tungod sa kadaghang mga isdang Bilong-bilong nga nasakmit nga kuha sa illegal nga pagpanagat hangtud kagahapon sa udto padayun gihapong gi-apod apod sa mga molupyo ang maong mga isda aron dili kini mabaho.

Samtang kadtong mga gipanghumolan og ice gidonar ngadto sa Regional Rehabilitation for Youth sa Candabong Argao. Ang mga nasikop nga tripulante ug kapitan ang nagtingkagol karun sa karsel sa paghimo ning balita ingon man gi-impound usab ang ilang panagatan.

Gibanabanang mokantidad og P150 mil ang balor sa mga nasakmit nga isda. (BANATNEWS)