CEBU, Philippines - Patay ang usa ka inahan nga natagak sa usa ka punoan sa dakong mangga pasado alas-3 sa miaging hapon sa barangay Poblacion lungsod sa Boljoon.
Ang biktima nailhan nga si Cecilia Hello Guradillo, 50, molupyo sa maong lugar ug usa ka caretaker sa usa ka panimalay.
Base sa imbestigasyon sa kapolisan sa lungsod sa Boljoon nasayran nga ang biktima mikatkat sa mangga nga adunay gitas-on nga kinse ka tiil aron anihon ang mga hinog na nga bunga niini.
Ang anak sa biktima nga si Priscilla mibutyag nga buot pa unta niyang tabangan ang inahan apan aduna pa siyay gikuha apan sa iyang pagbalik nagbuy-od na ang inahan sa yuta ug wala na maglihok.
Ang biktima dali nilang gidala sa Rural Health Unit sa maong lungsod apan gideklarar kini nga dead on arrival ni Dr. Eduardo Sedoripa. Sa pakighinabi sa Banat News sa hepe sa kapolisan sa lungsod sa Boljoon mibutyag wala silay nakitang foul play sa pagkamatay niini. (BANATNEWS)