'Terorista' gikuptan sa awtoridad

CEBU, Philippines - Gialarma sa kapulisan ang usa ka giingong Balik-Islam human kini gidudahan sa Muslim community tungod sa gipakita niining kadudahang linihukan sa miaging hapon samtang diha sa barangay Mambaling ning dakbayan sa Sugbu.

Si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) nagkanayon nga ang 58-anyos nga Balik-Islam (pangalan gipugngan sa Banat News) lumad nga taga Biñan, Laguna.

Matud pa ni Santander nga nakadawat sila og tawag gikan sa Office of the Muslim Affairs director Haijan Sakiran ug nagpahibalong dunay kadudahang tawo nga ilang nasigpatan nga kun maglihok usa ka Muslim apan aduna gyud silay nabantayang lahi ra kaayo ang lihok sa normal nga usa ka Muslim.

Tungod sa pagduda daling mitawag si Sakiran ngadto sa Cebu City Police Office aron masusi ang maong tawo.

Ang Muslim community dinhi sa Sugbu ug ang mga lokal nga kagamhanan lakip na kapolisan aduna nay kasabutan kaniadto pa nga magtinabangay aron mamentinar ang kahapsay ug kalinaw dinhi.

Niining bag-ohay lang gibutang sa alerto ang kapolisan ug Armed Forces of the Philippines gumikan sa mga nadawat nga impormasyon gikan sa ubang kaalyadong nasud kabahin sa hulga sa terorismo dinhi sa Pilipinas.

Ang maong lalaki sumala pang Santander mibutyag sa iyang pangalan ug nangangkong usa siya ka ‘researcher’ ug siya usa ka Balik-Islam (mga kanhi Kristiyanong mibalhin sa Islam nga relihiyon).

Mitug-an usab kini nga bag-o pa siyang miabot gikan sa Tagbilaran City sa Bohol ug duna lang siyay gibisitang higala duol sa Green Mosque sa barangay Mambaling.

Ang maong lalaki gi-turnover na karon ngadto sa Military Intelligence Group (MIG)-7 kinsa mohimo usab og linain nga pakisusi sa background niini.

Apan iyang gitataw nga ang tanang impormasyon nga gihatag kanila sa maong lalaki ilaha kining i-counter check pagsuta kung tinuod ba ang gipanulti diha kanila.

Dugang pa ni Santander nga gikan pa ang maong lalaki sa Cagayan De Oro, Bohol, dayon dinhi sa Cebu ug nagplano untang molahos sa Ilo-ilo City isip kabahin sa iyang research.

Matud ni Santander nga makig-alayon usab sila sa Regional Intelligence Division (RID) sa Police Regional Office-7 kabahin sa maong lalaki.

Kahinumduman nga tulo ka mga Balik-Islam nga sakop sa Rajah Sulaiman Movement ang misuway og pamomba sa usa ka dakong department store sa north reclamation area ning dakbayan tulo ka tuig na ang nakalabay.

Duha kanila ang napatay sa mirespondeng mga polis ug narekober ang improvised nga bombang ginama sa mortar shells nga gibilin sa pultahan sa maong department store, samtang ang ilang lider nga si Dinno-Amor Pareja, 28, kansang pangalan sa RSM mao si Khalil ug Abu Jihad nadakpan didto sa iyang hideout sa Marawi City sa Mindanao niadtong Agosto 21 sa milabay’ng tuig.

Si Pareja anaa sa wanted list sa Treasury Department sa Estados Unidos ug mao nay lider sa maong terrorist group maoy gitudlong usa sa mga nagplano sa pag-atake sa mga embahada sa United Kingdom, United States ug Israel sa Manila atol sa 12th Association of South East Asian Nations (ASEAN) dinhi sa Sugbu. (BANATNEWS)