Kagawad sa Talisay nangulata

CEBU, Philippines - Usa ka konsehal sa barangay Lagtang dakbayan sa Talisay kinsa giingon manghagis kung mahubog gireklamo na usab kining nanukmod og usa ka 18-anyos nga ulitawo niadtong Martes sa gabii, didto sa Lagtang.

Si Delmar Villena mipasangil kang Kagawad Wilson Alferez nga lasbag dihang gitukmod siya niini ug maayong pagkalukapa niya sa yuta.

Si Villena nga nahinabi sa mga tigbalita nagkanayon nga gikan siya sa ilang bunk house ug samtang naglakaw siya nasugatan niya si Alferez kinsa hubog ug isog kuno kaayo kining misita kaniya kun asa siya paingon.Matud ni Villena nga sa iyang kahadlok wala siya makatubag ug ang asawa ni Alferez maoy mitubag nga nagkanayon “tawo na ni Donie” (Donie Cabuenas iyang amo) unya dayong tukmod kaniya ug maayong pagkaigoa sa iyang liog sa kamot sa suspetsado dayong kausamod niya sa yuta.

Unya sa iyang pagbangon ang duha ka kauban sa inom ni Alferez   mikupot sa iyang abaga ug mikurog siya sa kahadlok kay abi niya og tiwasan siya og kulata.

Si Villena kinsa wala nalang molahos ngadto sa merkado kay aduna unta siyay paliton, mibalik ngadto sa ilang bunk house ug mitug-an sa iyang agawon bahin sa gibuhat ni Alferez kaniya.

Ang iya nang amo maoy mitabang kaniya aron ma-blotter   sa barangay ang nahitabo kaniya.

Sa pagka-Miyerkules nga maoy husay sa ilang kaso, wala motungha si Alferez sa barangay hall. Busa mibahad si Kapitan Marc Ferdinand Bas nga iyang iduso ang maong kaso ngadto sa Ombudsman kun dili gyud makighusay si Alferez kang Villena.

Kahinumdoman nga si Alferez sa miaging semana mihagit og pinusilay sa kapolisan nga iyang gikasuk-an gumikan kay wala husaya ang iyang problema bahin sa trapiko.

Unya matud pa sa kapolisan nga matag higayong malasbag si Alferez puwerting kusoga manghagis niini ug dili moila bisan polis pa.

Ang Banat News mitawag sa telepono sa landline ni Alferez aron makuhaan kini og pamahayag kabahin sa pasangil batok kaniya apan usa ka babaye ang nakatubag kinsa isog kaayo ug arogante ug nagdumili sa pagpaila sa iyang ngalan nga nagkanayon “dili mi magpaila, wala mi magkinahanglan og Banat”.

Human sa hangyo sa Banat News nga buot lang gyud mokuha og pamahayag gikan sa Kagawad ,gipasa sa maong babaye ngadto sa laing babaye ang telepono.

Ang nahisgutang laing babaye kinsa wala usab nagpaila isog kaayo ug nag-hysterical og tubag sa telepono ug ang ubang gipamulong niini nagkanayon nga “pataka lang mo og balita!, wala gani mo mokuha sa pikas side!, humana!, kinsa may gasugo ninyo!, pila may gibayad ninyo!”

Gumikan niini si Kapitan Bas mipasidaan nga gawas sa Ombudsman, ipasa pa niya ngadto sa DILG ang kaso ni Alferez. – BANAT NEWS