Lider sa union sa VECO 'ipa-reinstate'

CEBU, Philippines - Mimando ang kalihim sa Department of Labor and Employment nga si Rosalinda Dimapilis Baldoz ngadto sa Visayan Electric Company nga ibalik sa payroll ang lider sa nagwelgang mga sakop sa VECO Employees Union nga si Casimero Mahilum.

Gumikan niini, dili na madayon ang hulga sa mga sakop sa unyon nga mohimo og strike human unta sa hearing kagahapon diha sa National Conciliation and Mediation Board kun walay maayong dangatan ang hearing.

Apan mipagawas ang DOLE sa maong kamandoan nga gihangop usab ni Mahilum. Si Mahilum gitaktak na sa VECO human kini moreklamo kabahin sa mga paglapas sa maong kompanya sa ilang Collective Bargaining Agreement.

Ang kamandoan sa DOLE nagkanayon: “Pending resolution of the dispute, the Company (Veco) is hereby ordered to reinstate Casimero Mahilum in its payroll. Both parties are likewise ordered to refrain from committing any act that will worsen the situation.”

Kung si Mahilum ang pabut-on, mas ganahan siyang motrabaho sanglit magdawatan man gihapon siya og sweldo.

“Ganahan ko nga akong ipakita nga nagtrabaho ko, nagpasalamat mi ni Secretary Baldoz kay bisan paman nga nagpadayon ang hearing,   makasuporta gihapon ko sa akong pamilya gumikan sa iyang kamandoan nga ipa- reinstate ang akong payroll ,” sumala pa ni Mahilum.

 Gipasalamatan usab ni Mahilum ang mga sakop sa media gumikan kay nakatampo kini sa pagpagawas sa ilang mga yangungo ug nasayod ang publiko sa tinuoray nila nga sitwasyon.

Ang maong kamandoan usab nag-ingon nga kinahanglang ipaabot na ngadto sa National Labor Relations Commission ang pagdungog sa kaso subay sa Labor Code.

Ang tigpamaba sa Veco nga si Ethel Natera sa gipadalang pamahayag dinhi sa Banat News nagkanayon nga ang pag-reinstate kang Mahilum nalakip na sa ilang gitanyag kaniadto.

Giklaro usab ni Natera nga base sa kamandoan sa DOLE wala kini maghisgut og physical reinstatement ni Mahilum gawas lang sa reinstatement niini sa payroll, kini nangahulogan dili kini motambong sa trabaho apan swelduhan gihapon hangtud nga mahusay ang kasungian. – BANAT NEWS