Notadong tulisan napusilan

CEBU, Philippines - Nalandig sa tambalanan ang usa ka suspetsadong tulisan human kini mapusili sa usa ka police trainee nga nagbansay sa Field Training Program (FTP) niadtong Miyerkules sa alas 10:45 gabii diha sa sitio Mananga, barangay Tabunok, dakbayan sa Talisay, ang kaubang tulisan nadakpan sad.

Ang napusilan ni PO1 Jessieben Gumandal mao si Johnly Abangan, 24, taga North Poblacion, dakbayan sa Naga kinsa nakaangkon og samad pinusilan sa walang bahin sa tiyan ug milapos ngadto sa tuong bahin sa iyang lawas.

Si Abangan daling gidala sa mga polis ngadto sa Talisay City District Hospital apan tungod sa kahimtang niini gibalhin ngadto sa Vicente Sotto Memorial Medical Center. Laing kauban ni Abangan mao si Jeffrey Paran, taga barangay Poblacion, dakbayan sa Naga nakasibat human sa hitabo apan nadakpan gihapon sa hot pursuit operation kagahapon sa hapon diha sa barangay Langtad sa Naga.

Ang biktima sa pagpanulis mao si Myla Mantalaba Bariquiot, 40, taga sitio Tiber, barangay Poblacion, lungsod sa Minglanilla.

Si PO3 Edwin Alvarado, duty desk officer sa Talisay City Police Station nagkanayon nga si Bariquiot gikan nag-withdraw og kwarta sa ATM diha sa barangay Tabunok ug dihang mosakay na kini sa iyang awto kalit mitungha ang mga suspek ug miduol ngadto sa biktima.

Sa pagtuong adunay dautang tuyo ang duha daling gi-lock ni Bariquiot ang awto tungod kay tua sa sulod ang iyang mga anak ug dali kining midagan palayo ug misakay siya og multicab pasaheroan paingon sa habagatan.

Apan gisundan kini sa mga tulisan ug pag-abot diha sa sitio Mananga gibabagan sa mga tulisan sa ilang gisakyang motorsiklo ang multicab ug ang backrider misaka dayong tion og armas kang Bariquiot ug gikuha ang pouch bag niini nga dunay sulod nga pitaka nga may P22,500 nga salapi nga iyang gi-withraw, duha ka ATM cards ug SSS ID.

Si Gumandal nagpatrolya nga duol sa gihitaboan nakabantay sa komosyon ug daling miresponde apan midagan si Abangan ug misakay sa motorsiklo ug miikyas.

Sumala pa nga nabantayan ni Gumandal nga mibunot sa giluklok nga armas si Abangan maong giunhan niya kini pagpusil hinungdan sa pagkaigo niini sa tiyan ug nahagbong sa motorsiklo.

Nabawi ni Gumandal ang bag sa biktima gikan ni Abangan ingon man ang kalibre .38 nga revolver nga dunay serial number nga SN-778592 nga dunay lima ka mga buhing bala.

Si Supt. Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga si Abangan miangkon nga sila maoy mitulis sa Petron Gasoline Station diha sa barangay Lawaan I niining bag-o lang ug sila usab ang mitulis sa Nemeño Reach. Com Internet Café and Training Center diha sa barangay Tabunok.

Nasuta nga ang .38 rebolber nga nakuha kang Abangan mao ang service firearm sa gwardiya sa maong internet café nga si Ernie Roy Ayok nga giilog sa maong suspetsado.

Sa pagkasikop kang Paran diha sa ilang hideout sa Langtad, Naga na-recover sa mga polis ang halos usa ka sakong mga bag ug mga personal nga butang sa mga nabiktima sa duha ug duha ka motorsiklo.

Sa laing bahin, si Sr. Supt. Erson Digal, hepe sa Cebu Provincial Police Office hatagan og pasidungog si Gumandal tungod sa nahimo niini ug irekomendar niya kini ngadto sa Provincial Police Office (PRO)-7.   – BANAT NEWS