Gipusil sa silingan naangol

CEBU, Philippines - Naangol ang usa ka tawo human kini pusila sa iyang silingan sa sitio Saac 2, barangay Buaya, dakbayan sa Lapulapu sa miaging buntag.

Ang biktima mao si Jesson Maloloy-on, hingkod, minyo, samtang ang suspetsado mao usab si Marcelino Taqueouchi, alyas Hapon ug pulos nagpuyo sa maong dapit.

Si PO1 Jonard Cinco sa homicide section sa kapolisan sa maong dakbayan nga nahinabi sa Banat News miingon nga diha sa tugkaran sa ilang balay ang biktima dihang kalit lamang giluthang sa suspetsado .

Ang biktima kinsa naigo sa iyang bukobuko daling gihatod ngadto sa Lapulapu District Hospital sa sitio Carajay sa barangay Gun-ob sa maong dakbayan apan gibalhin kini ngadto sa   Vicente Sotto Memorial Medical Center sa dakbayan sa Sugbo.

Dugang pa ni PO1 Cinco nga human sa maong pagpamusil , ang suspetsado misibat dayon pahilayo sa maong dapit ug kasamtangan karon nilang gipangita.

Si PO1 Cinco miingon nga naglibog sila sa hinungdan sa maong pagpamusil sanglit gawas nga managsilingan ang biktima ug suspetsado wala usab kuno kini magkaaway. – BANAT NEWS