Magbabalaod sa Visayas makadawat sa PDAF

CEBU, Philippines - Ang mga magbabalaod sa Visayas ilabina na dinhi sa lalawigan sa Sugbo makadawat sa tukma nilang Priority Development Assistance Fund (PDAF).

Kini aron may magamit silang igong pundo nga ilang ikahatag sa pagpatukod sa ilang gisaad nga infrastructure project sa ilang tagsa-tagsa ka distrito.

Gitug-an ni 6th district Congressman Gabriel Luis Luigi Quisumbing sa interview sa DyRF nga sa wala pa maaprobahi sa ubos balay balauranan ang budget sa nasud alang sa sunod tuig, ila nang gikasabot daan si Budget Secretary Florencio Butch Abad.

Matud pa ni Quisumbing nga si Abad mipasalig sa mga kongresista sa Kabisay-an ilabina dinhi sa Sugbo nga makadawat sa tukma nilang mga pundo.

Iyang gipasabot nga si Abad ug mga kaubanan niini sa Malacañang nakasabot usab sa kaimportante sa Kabisay-an.

Matud pa ni Quisumbing nga mihatag og commitment si Abad nga motabang gyud sa Visayas tungod kay ang Visayas mahinungdanon kaayo sa ekonomiya sa nasud. 

Nagpaabot si Quisumbing nga kahatagan og igong pundo ang Visayas sanglit dako kini og ikatabang sa pagpadagan sa ekonomiya sa nasud.  – BANAT NEWS