Gipusposan, gipusil naangol

CEBU, Philippines - Usa ka bayong-bayong kinsa giligid og pusil human pusposi og dos por dos sa kontra usab niyang batan-on nakaikyas sa tinong kamatayon human siya magbubalintong ug mag-ikid-ikid aron paglikay sa mga bala sa kamatayon didto sa sitio Laguna, barangay Bulacao, ning dakbayan sa Sugbo sa miaging hapon.

Siya mao si Mandy Cabahug, 17, ulitawo nga taga sitio Siwak, sa maong barangay, samtang ang mga suspetsado mao sila Raymund Alalin alias Cabang, ug ang ginganlan lang og Itoyz.

Matud pa ni PO3 Victor Ayuman sa Homicide section sa kapolisan sa dakbayan sa Sugbo sa pakighinabi sa Banat News pinaagi sa telepono nga ang biktima naglakaw sa maong dapit sa dihang kalit lang kining gisugat ni Itoyz ug gibunalan og kahoy.Sa tantong sagang sa biktima sa nagpungasi nga bunal nakimay ang tuong kamot niini.

Unya kalit lang miabot ang laing suspek nga si Alalin nga armado nang daan og wala matinong kalibre sa armas ug gipusil ang biktima sa makatulo apan nakalihay kini ug wala maigo.

Apan si Itoyz nga may dala usab diay’ng  armas, mipusil usab sa makaduha ka higayon sa biktima apan napingsan lamang kini sa bala gumikan sa kaabtik niyang limbaglimbag sa lawas pag-likay sa mga bala sa kamatayon.

Ang mga nanan-aw nakaingon nga hinan-aw og sine ang biktima gumikan sa gipakitang kaabtik niini.

Ang mga suspetsado padayon pang gipangita sa kapolisan human kini makasibat.  – BANAT NEWS