VM sa Barili gireklamo kay naninghag

CEBU, Philippines - Mireklamo ang Information officer sa lungsod sa Barili batok sa ilang bise mayor gumikan kay gisinghagan kuno siya niini didto sa buhatan sa kapolisan sa maong lungsod niadtong Martes sa alas 8:30 sa buntag.Matud pa ni Information officer Felomino Leyson nga iya kining gipa-blotter sa kapolisan gumikan sa giingong pagpaninghag niini kaniya.Apan gibutyag ni Sr./Insp. Marlon Gumabao ang hepe sa Barili Police Station sa Banat News nga saksi ang iyang mga sakop dihang nagkaabot si Leyson ug si bise mayor Garcia sa ilang buhatan nga walay tensiyon nga nahitabo didto.

Hinuon matud pa ni Gumabao nga nangayo og katahoran si Leyson ngadto sa bise mayor, apan matud pa giingnan kini sa naulahi nga ”polis ka rin pala” dayong gawas sa bise mayor.

Apan miinsister ni Leyson sa Banat News pinaagi sa telepono nga arogante ug isog kuno kaayo nga nanginsulto kaniya ang bise mayor nga nagkanayon “nganong nia man ka diri, polis ka?”

Gumikan niini si Leyson miingon nga gi-refer na niya sa iyang abogado ang maong panghitabo alang sa legal nga lakang nga himoon niini batok sa bise mayor.

Si Leyson maoy information officer ni Mayor Teresito Mariñas sa ilang lungsod.

Gumikan malagmit kay dili na maayo og relasyon ang mayor ug ang bise mayor, nagtuo si Leyson nga napagan siya sa kasuko sa bise Mayor ngadto kang Mayor Mariñas.  – BANAT NEWS