Mga kapitan sa Lapulapu manumpa ugma

CEBU, Philippines - Ang mass oath taking sa mga midaug nga barangay kapitan sa miaging barangay election sa dakbayan sa Lapulapu gitakda ugma Nobiyembre 12.

Si Barangay Kapitan Leo Mercado sa barangay Pajo nga maoy kasamtangang federation president sa Association of Barangay Council (ABC) kinsa nasublian usab sa katungdanan lakip nga manumpa.

Si Kapitan Mercado nga nahinabi sa Banat News miingon nga ang makasalmot sa maong mass oath taking   mao ang mga bag-o ug mga daan nga barangay kapitan nga kaalyado sa ilang grupo nga gipangulohan nila ni Mayor Paz Radaza ug sa kapikas niini nga si Kongresista Arturo Radaza.

Dugang pa niya nga ang mga midaug nga kapitan nga habig sa oposisyon, dili malakip sa maong mass oath taking gawas lamang sa pipila nga nagpakita na og tinguha sa pagtipon sa ilang grupo.

Si Mercado miingon nga ang gitakdang mass oath taking pangulohan mismo ni Mayor Radaza ug Kongresista Radaza uban usab kanila ang mayoriyang sakop sa konseho nga pulos usab kaalyado sa ilang grupo.

Gitataw niya nga sa 30 ka kapitan sa barangay sa mainland, ug 11 sa Olango Island, duha lamang kanila ang anaa sa oposisyon nga mao sila si Kapitan Isabelito Darnayla sa barangay Basak ug Kapitan Nestor Paypa sa barangay Canjulao.

Ang laing bag-o nga mga barangay kapitan nga kauban sa ilang grupo mao sila si barangay Kapitan Remegio Oyao sa barangay Marigondon, Joselito Tibon sa barangay Suba, Basbas ug barangay kapitan Virgilio Casio sa Pangan-an, isla sa Olango. – BANAT NEWS