Provincial board pabor bar exam anhi sa Sugbo

CEBU, Philippines - Ang mga sakop sa hunta probinsiyal miduyog usab sa nagkalapad nga panawagan ngadto sa Korte Suprema sa pagpahigayon sa bar examination dinhi sa Sugbo karong sunod tuig. 

Usa sa hinungdan mao nga aron kalikayan nga dili masubli ang nahitabo sa usa ka tinun-an sa kursong abogasiya sa University of San Jose Recoletos nga gikulata ug gipasanginlang maoy milabay og granada didto sa De La Salle University sa Taft Avenue, Manila sa miaging bulan.

Suma pa ni Provincial Board Member Sergio Restauro sa unang distrito sa iyang gipasar nga resolusyon nga ang maong pagpamomba human sa bar examination nagtawag sa hugot nga siguridad alang sa mga mokuha og bar exam sa umaabot pang panahon.

Matud pa ni Restauro nga mas mapahugtan pa ang siguridad kun gamay ang bantayanan sa mga awtoridad hinungdan nga gisuportahan niya ang awhag ngadto sa labaw’ng hukmanan nga hatagan og higayon ang mga mokuha sa bar nga taga Kabisay-an nga anhi lang mo-eksamin sa dakbayan sa Sugbo.

Alang kaniya mas daghang mokuha og bar exam kun anhi kini ipahigayon sa Sugbo sanglit gamay ra ang gasto sa ilang pagpuyo ug pagkaon dinhi itandi sa Manila.

Ang napasar nga resolusyon nga gipangamahanan ni Restauro uban ni Provincial Board Member Julian Daan sa unang distrito gihapon, ihatud sa dili madugay  ngadto sa Korte Suprema.   – BANAT NEWS