Gwen nagpaabot og hulga

CEBU, Philippines - Gipahibawo ni Gob. Gwendolyn Garcia nga may paabuton siyang mga hulga sa kinabuhi tungod sa iyang pagdeklarar og “all out war” batok sa illegal fishing sa tibuok lalawigan.

Si Garcia nagkanayon nga bisan paman niini magpadayon ang iyang kampanya batok sa illegal fishing.

Matud sa gobernador nga sayod siya nga daghan kaayong maligsan sa iyang kampanya nga dili magpanuko sa pagsugo og mga tawong mopahilom kaniya.

Apan iyang gitataw nga wala siya mahadlok niining mga tawo nga mohulga kaniya kay hingusgan pa hinuon niya ang kampanya.

Iyang gihimong sanglitanan ang nahitabo ni anhing Jojo dela Victoria, kanhi pangulo sa Bantay Dagat kinsa tungod sa iyang paggukod sa mga illegal fishers gipapatay.

Matud pa sa gobernadora nga dili niya makalimtan si dela Victoria tungod sa nakigtigum pa kini siya aron hisgutan ang mga lakang nga pagahimuon sa probinsiya alang sa proteksyon sa kadagatan.

Mipagawas og executive order si Garcia nga nag-umol sa Anti Illegal Fishing Task Force ug pipila palang ka adlaw gikan sa pagkatukod niini linibong kilo sa mga isda nga nakuha sa ilegal nga pamaagi ang gisakmit. – BANAT NEWS