Hot meat gibantayan

CEBU, Philippines - Gipahugtan karon sa Department of Veterinary Medicine and Fisheries (DVMF) ang pagbantay sa   mga karneng baboy sa kamerkadohan karong kusog kaayo ang demand niini kay duol na ang Pasko.

Aminado hinuon ang hepe sa DVMF nga si Dr. Alice Utlang   nga menus ra ang posibilidad nga makasakmit sila og hot meat karong panahona gumikan kay kusog kaayo ang halin sa karne kung maghinapos ang tuig.

“Sa nangagi nga mga tuig, dili man mangabot ang mga hot meat panahon sa Disyembre, pero dili gihapon ta mokompiyansa kay dili man gyud na malikayan nga adunay magpabadlong. Basta ang DVMF, manaa ma’y okasyon o wala, alerto gyud ta permi,” nagkanayon si Utlang.

Gipahimangnoan ni Utlang ang publiko nga kinahanglan nga mopalit og karne adto lang sa mga legitimate nga tindahan aron  dili mahimutang sa peligro ang ilang panglawas.

Aron mapaniguro gyud nga luwas ang karne, ang customer mahimong motan-aw sa meat inspector certificate sa tag-iya sa karne. Sa pagka-karon, wala pa’y nadawat nga report ang DVMF sa mga namaligya og hot meat.  – BANAT NEWS