Anak sa sec. officer sa mayor nasikop

CEBU, Philippines - Nasikop sa kapolisan ang anak sa usa ka security officer sa mayor sa syudad sa Bogo didto sa barangay Taytayan sa maong syudad sa miaging gabii.

Ang nasikop mao si Nicolas Anthony Yee, 38, anak ni Cristituto Yee ang Chief Security Officer ni Mayor Celestino Martinez.

Nasikop si Yee pinaagi sa search warrant giluwatan ni RTC Branch 10 Judge Soliver Peras.

Sa pakighinabi sa Banat News kang CIDG-7 Bogo City Detachment Chief Inspector Fermin Armendares, kini mibutyag nga nakadawat sila og daghang kasayoran kalabot sa illegal nga patigayon sa suspetsado.Gawas niini daghan na kaayong mireklamo nga mga silingan sa suspetsado nganong wala kini sikopa sa kapolisan nga unta tataw man kaayo ang iyang illegal nga negosyo.

Busa giaplayan dayon nila og search warrant, apan matud pa ni Armendares nga sa wala pa nila isilbi ang search warrant mihimo una sila og test buy ngadto sa suspetsado pinaagi sa pagpalit og usa ka gamay’ng paketi sa gituohang shabu nga nagkantidad og P300. Human ipasusi nila kun tinuod ba gyud nga shabu ang ilang napalit,   wala na maglangay ang kapolisan sa CIDG-7 ug kapolisan sa syudad sa Bogo, ila dayong gisilbi ang search warrant.

Matud pa ni Armendares nga atol sa pagtunol nila sa search warrant gipasaksi nila ang amahan mismo sa suspetsado uban sa public information officer sa Bogo, ug ang DOJ Officer.

Nasakmit sa kapolisan mao ang 20 ka tinfoil, 5 ka gagmay’ng paketi sa gituohang shabu, usa ka medium pack sa gituohan nga shabu, mga basiyo sa gituohang ginamit nga shabu, disposable lighter, usa ka cell phone ug kwarta nga nagkantidad og P3, 600.

Sa pagkakaron nagtingkagol na sa prisohan si Yee ug nagpaabot nalang sa kaso nga isang-at batok kaniya.   – BANAT NEWS