Kaso sa mediaman gibasura

CEBU, Philippines - Gibasura sa korte ang kasong libelo nga gipasaka sulod sa pito ka tuig na ang nakalabay sa magtiayong mayor ug bise mayor sa lungsod sa Malabuyoc batok sa usa ka blocktimer nga komentarista sa radyo niadto lang adlaw’ng Martes petsa 9 ning bulana.

Si Regional Trial Court RTC-7 Branch 62 sa lungsod sa Oslob Judge Stewart Ramon E. Himalaloan mibasura sa kasong libelo nga gipasaka sa magtiayong Mayor Daisy Creus ug banang si Bise Mayor Narciso Creus batuk sa komentarista sa Bantay Radyo nga si Apolinario “Jun” Arigo.

Si Bise Mayor Creus nga mao pay mayor niadtong tuig 2003 maoy mipasaka og kaso batok kang Arigo sa petsa 5 sa bulan sa Hulyo sa susamang tuig tungod sa gihulagway niining mga sakit nga komentaryo batok niya atol sa programa ni Arigo nga nagtumbok kaniya nga usa sa pipila ka mga mayor nga abusado ug kurakot.

Giingong nauwawan ug naapektahan ang pamilya ni Creus sa gihimo ni Arigo hinungdan nga mipasaka kini og kaso. Apan si Judge Himalaloan mipakanaug sa hukom nga nagbasura sa maong kaso gumikan kay napakyas ang prosekusyon pagpresentar og mga balidong ebidensiya nga magpamatuod sa maong mga alegasyon.

Nasayran nga tulo na ka huwes ang naghupot sa maong kaso nga milanat og pito ka tuig. Ang unang huwes nga migunit niini mao si Judge Dela Peña nga miretiro na, dayun gisundan ni Judge Geraldine Ycong nga na-promote na sa Supreme Court ug karon si Judge Himalaloan.

Samtang si Arigo sa iyang bahin mipadayag dihang nakuhaan og reaksiyon sa Banat News  nga sa katapusan nalimpyuhan ang iyang pangalan ug mihulagway sa maong kaso nga usa lang ka “harassment.”  - BANAT NEWS